Vorpróf á unglingastigi hefjast þriðjudaginn 22. maí.  Próftöflur unglingastigs má nálgast hér.

Foreldrafélag Álfhólsskóla hlaut þann heiður að vera eitt af 28 verkefnum sem var tilnefnt til foreldraverðlauna Heimilis og skóla. Þessi tilnefning er viðurkenning á því að vel hafi tekist til við að koma á fót nýju foreldrafélagi í sameinuðum skóla og er mikil hvatning fyrir þá sem starfa fyrir félagið. 
Verðlaunaafhendingin fór fram í Þjóðmenningarhúsinu í dag. Á heimasíðu Heimilis og skóla má sjá fréttir og myndir frá þessum viðburði og hverjir hlutu verðlaunin.
Foreldrafélagið fékk viðurkenningarskjal fyrir að vera tilnefnt til verðlaunanna. 

Miðvikudaginn 16. maí  var síðasta leik- og tónlistarsýningin hjá 5. bekk í landnámsþema vetrarins. Í leiklistarhópnum voru nemendur sem áttu rætur sínar til að minnsta kosti átta þjóða. Var verkið um víkinga sem ræna og tæla fólk í mörgum löndum á leið sinni til þess að nema land á Íslandi og komu mörg tungumál við sögu.  Tónlistarhópurinn söng lagabrot frá öllu þessum löndum auk þess að flytja frumsamið forspil og leikhljóð.

Síðasta leik- og tónlistarsýning vetrarins var frumsamið leikverk með frumsaminni tónlist og skreytt sviðsmynd frá myndmenntarhópnum. Verkið var unnið upp úr þjóðsögum um nykur sem hefst við í fjallavötnum og narrar börn til að setjast á bak sér en steypir sér svo með þau niður í hyldýpið.  Sýningin tókst afar vel, margir foreldrar mættu og fóru allir glaðir heim. Hér má sjá myndir úr sýningunni.